رأي حُر

على بلاطة.. أتعرفون معنى يوم الأم فعلا!

مشكلتنا أننا أحسن ناس نمسك خط على أي سالفة ونخش فيها عرض بدون تفكير، والواحد فينا يصير يشخص قدام اخوياه انه متحضر ويعرف متى اليوم العالمي لكل شي، ولا يفوته طبعا تاريخ عيد الأم، لأنه بيسوي فيها الولد البار وبيحط له كم صورة على صفحاته الشخصية من النوع اللي عليه دبدوب كبير وجمبه واحد ثاني صغير ومكتوب قدامهم love U mam!

ما اقول الا الله يذكر ايام الابتدائي بالخير يوم انك ماتحتفل الا بالاعياد الرسمية واسبوع المرور، الحين صار حب الواحد فينا لأمه مربوط بتاريخ ووقت معين، وش دعوة باقي الايام عايشين مع امهات غير؟ يجيك الواحد فيهم يقول لازم يوم في السنة نتذكر امهاتنا ونشتري لهن هدايا! وماشا الله عليك ناسي طول السنة وتبي تتذكر في يوم واحد، وبعدها ترجع تكمل حياتك؟!

ياليت نخلي الهياط وشغل المظاهر، وترا بر الأمهات من صميم ديننا يعني خلوا عنكم الخرابيط اللي ما لها سنع، اللي يحب امه من جد مايحتاج له يوم خاص لأنه بيعرف يعاملها بنفس درجة البر والتقدير كل يوم، ولا بيحتاج له موعد خاص عشان يهديها شي، اللي يضحك انك تشوف هذولي طول اليوم حاطين لك هالشعارات والصور على صفحاتهم وجوالاتهم، لكنهم برا البيت وامهم لحالها، وهم طالعين يحتفلون بيومها مع اخوياهم!

بقلم: أبو العريف

السابق
خطبة دروس من الهجرة النبوية الشريفة
التالي
حول حديث ناقصات عقل ودين